2010-05-06

مربـى الفراولـة

النهاردة ان شاء الله هاقدم لكم نوع جميل من المربات الكل بيحبها وتمتاز بطعم رائع وهي

مربى الفراولة يالا نشوفها

مربى الفراولة

=======

المقادير

====

كيلو فراولة - 2 كوب سكر - نصف ليمونة + نصف ملعقة ملح ليمون واذا لم يتواجد سيبقى ليمونة كاملة

ملعقة كبيرة جيلاتين أو نصف باكو جيلي فراولة

الطريقة

====

أول خطوة طبعا نغسل الفراولة كويس جدا كذا مرة ونشيل العنق الأخضر ثم نضعها في طبق عميق

ونضع عليها كوب ونصف سكر ونتركها في التلاجة لثاني يوم هاتكون بالشكل ده



هانلاحظ انها نزلت عصير كتير هناخد كوب من العصير ده ونشيله على جنب

ونحط الفراولة بالعصير اللي فيها+ نصف كوب السكر المتبقي على النار ونقوم بهرسها بأي شيء

مثلا بالشوكة



وبعد أن تغلي ننزع الريم باستمرار ولو لاحظتو الريم المنزوع يحتوي على الحبيبات الصغيرة الموجود في الفراولة علشان كده بنتخلص منه



ثم نضع عصير الليمونة اذا هانستعمل ملح الليمون يبقى في الآخر خالص بعد ماتستوي

أما اذا هانستعمل الليمون فقط نضعه في هذه الخطوة

نخفف النار عليها وتترك الى أن تنضج وطبعا عارفين شكل المربى هاتكون تخلصت من العصير وبقت

سميكة

فاكرين كوب العصير اللي احتفظنا بيه في الأول دلوقت هانحطة في اناء على النار وبعد أن يغلي

نضع الجيلاتين أو جيلي الفراولة



ثم نضعهم على المربى وتترك لتغلي 5 دقائق وتكون هكذا



ونختبر النضج بأن نضعها في طبق ونلاحظ انها تكون قشرة على الوجه ولاتسيح بمجرد وضعها في الطبق



ثم تترك لتبرد ونكون معقمين البرطمانات بأن نغليهم في ماء ثم يتركو ا ليجفوا

ثم نعبىء المربى في البرطمات ونغطيهم ثم نضعهم في اناء به ماء ويغلى 5 دقائق لكي يخرج

الهواء من البرطمانات



شوفوا أنا دلعت البرطمانات بتاعتي ازاي



ودي النتيجة مربى من صنع ايديكي وممكن تزيني الطبق بالزبدة أو القشطة



ايه رأيكم يالا كلكم تجيبوا فراولة وتعملوا منها حاجات حلوة

هاقولكم على حاجة حلوة كمان بمناسبة وجود الفراوله

وانتي بتعملي المربى شيلي واحدة وبعد ماتخلصي المربى وتروقي خدي الفراولة واهرسيها

كويس قوي واذا عندك موز حطي ربع موزة واهرسيهم جامد واعمليهم ماسك للوجه وبعد

ربع ساعة أفركي وجهك بس بالراحة جدا علشان بشرة الوجه بتبقى رقيقة وحساسة

المهم افركي على الخدود بحركة دائرية وعلى الجبين من جوة لبرة وبعدين اغسلي وجهك

وبقطعة قطن حطي عليها ماء ورد ومشيها على وجهك وشوفي النتيجة بعد كده بشرة ناعمة

وخدود موردة وممكن اذا مافيش موز ممكن تحطي نصف ملعقة نشا مع الفراولة المهروسة

ونتيجتها حلوة كمان.

وممكن تكرريها بعد عشرة أيام

شوفتوا بقى الفراولة بتعمل ايه وان شاء الله أكون أفدتكم وتكون طريقتي في المربى عجبتكم

وألقاكم على خير ان شاء الله


ليست هناك تعليقات: